Home
Previous
Text to find
Next
Pali Canon: sutta pitaka , anguttara nikaya , book: 5 , database record: 6888 .
[BJT Page:148] [x 148/]
7.
Puna ca paraṃ bhikkhave rājā uccaṭṭhānīyaṃ nīce ṭhāne ṭhapeti yesaṃ taṃ amanāpaṃ tesaṃ evaṃ hoti: ''rājā kho pabbajitena saṃsaṭṭho, siyā nu kho pabbajitassa kammanti''. Ayaṃ kho bhikkhave sattamo ādīnavo rājantepurappavesane.

8. Puna ca paraṃ bhikkhave rājā akāle senaṃ uyyojeti, yesaṃ taṃ amanāpaṃ, tesaṃ evaṃ hoti: ''rājā kho pabbajitena saṃsaṭṭho, siyā nu kho pabbajitassa kammanti. '' Ayaṃ bhikkhave aṭṭhamo ādīnavo rājantepurappavesane.

9. Puna ca paraṃ bhikkhave rājā kāle senaṃ uyyojetvā antarāmaggato nivattāpeti, yesaṃ taṃ amanāpaṃ tesaṃ [PTS Page 083] [q 83/] evaṃ hoti. ''Rājā kho pabbajitena saṃsaṭṭho, siyā nu kho pabbajitassa kammanti. '' Ayaṃ bhikkhave navamo ādīnavo. Rājantepurappavesane.

10. Puna ca paraṃ bhikkhave rañño antepuraṃ hatthisammaddaṃ assasammaddaṃ rathasammaddaṃ1 rajanīyāni rūpa sadda gandharasaphoṭṭhabbāni yāni na pabbajita sāruppāni. Ayaṃ bhikkhave dasamo ādīnavo rājantepurappavesane.

Ime kho bhikkhave dasa ādinavā rājantepurappavesaneti.

10. 1. 5. 6

Sakya suttaṃ

Ekaṃ samayaṃ bhagavā sakkesu viharati kapilavatthusmiṃ nigrodhārāme atha kho sambahulā sakkyā2 upāsakā tadahuposathe yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho sakye upāsake bhagavā etadavoca: ''api nu kho tumhe sakyā aṭṭhaṅgasamannāgataṃ uposathaṃ upavasathā''ti?
''Appekadā mayaṃ bhante aṭṭhaṅgasamannāgataṃ uposathaṃ upavasāma, appekadā na upavasāmā''ti. Tesaṃ vo sakyā alābhā tesaṃ dulladdhaṃ ye tumhe evaṃ sokasabhaye jīvite maraṇasabhaye jīvite appekadā aṭṭhaṅgasamannāgataṃ uposathaṃ upavasatha, appekadā na upavasatha, taṃ kiṃ maññatha sakyā, idha puriso yena kenaci kammaṭṭhānena anāpajja3 akusalaṃ divasaṃ aḍḍhakahāpaṇe nibbiseyya, [PTS Page 084] [q 84/] dakkho puriso uṭṭhānasampannoti alaṃ vacanāyāti? Evaṃ bhante,

1. Hatthisammadaṃ, assasammadaṃ, rathasammadaṃ, sīmu 2. Sakkyā, machasaṃ
3. Anāpapajajaṃ, sīmu.